Quest onn ha la Svizra il presidi da l'Organisaziun per la segirezza e la cooperaziun en l'Europa (OSCE). Sco minister da l’exteriur da la Svizra surpiglia il cusseglier federal Ignazio Cassis automaticamain il presidi da l'organisaziun.
Il Cussegl federal ha definì trais prioritads centralas per l'onn presidial: dialog, fidaivladad e segirezza. Igl è la terza giada che la Svizra survegn quest presidi. Per l’emprima giada aveva la Svizra il presidi il 1996 e la segunda giada il 2014. Da surpigliar danovamain il presidi saja ina onur che portia ina gronda responsabladad cun sai, ha Cassis accentuà.
La guerra da la Russia encunter l'Ucraina sco gronda sfida
La guerra da la Russia cunter l'Ucraina, che dura gia quatter onns, represchenta la gronda sfida da l'organisaziun. La Russia blocca per il mument l'organisaziun. Cun l’attatga sin l’Ucraina ha la Russia cuntrafatg als principis da l'OSCE. Al cumenzament da l’onn presidial da la Svizra ha Ignazio Cassis visità tant l'Ucraina co era la Russia. El ha inscuntrà il minister da l'exteriur russ Sergey Lawrow entschatta favrer.
OSCE
-
Bild 1 von 4. Per la terza giada presidiescha la Svizra la OSCE (1996/2014/2026). Bildquelle: Keystone.
-
Bild 2 von 4. Quai fa Ignazio Cassis co minister da l'exteriur. En sia funcziun co president era el en l'Ucraina ed ha inscuntrà il president ucranais Wolodomir Selenski. Bildquelle: Keystone.
-
Bild 3 von 4. Era è Ignazio Cassis viagià en Russia. Bildquelle: Keystone.
-
Bild 4 von 4. Là ha el inscuntrà il minister da l'exteriur russ Sergej Lawrow. Bildquelle: Keystone.
Rolla dal rumantsch
Il rumantsch gioga ina rolla speciala durant l'onn presidial da la Svizra. La raschun è da mussar ch'igl è pussaivel da conviver cun differentas linguas e culturas en in pajais. Che la multifariadad linguistica e culturala è in gudogn per l'entira societad e che la diversitad na duai betg vegnir cumbattida – quai ch'è dentant en bleras regiuns il cas.
Situaziun actuala e perspectivas
Lucas Renaud dal «Center for Security Studies» da la Scola politecnica federala a Turitg constatescha che l'organisaziun è «per ina pulita part paralisada» pervia da la guerra. La Russia haja rut fundamental cun il vest e cun l'urden da segirezza e pasch.
Malgrà quai dettia però secturs da l'OSCE che funcziuneschian enavant: sco il barat da tschertas infurmaziuns davart las truppas armadas. Renaud accentuescha ch'ins stoppia esser realistic tge che pertutga las pussaivladads dal la Svizra durant l’onn presidial. La OSCE sco lieu d'inscunter e da dialog haja ina impurtanza era en quella situaziun.
Impurtanza istorica da l'OSCE per la Svizra
Tenor l'istoricher Sacha Zala, schef dal Dodis (post da perscrutaziun da documents da la politica svizra), è l'OSCE fitg impurtanta per la politica da l'exteriur svizra. Zala di che la politica da l'exteriur svizra saja en sasez vegnida inventada grazia l'organisaziun. Avant na viagiava per exempel nagin cusseglier federal en l’exteriur. La Svizra avevia avant l’OSCE ina politica da l’exteriur plitost anormala.
Entras la participaziun a l’organisaziun s’ha la politica pudì normalisar. En Svizra sez er’ins d’accord da sa participar a l’organisaziun causa che tut las partidas da la guerra fraida han mussà interess d’esser part da l’organisaziun. Uschia era quai per la Svizra neutrala in’opziun.
Cun suttascriver la charta da la KSZE han ins vis ch'il mund na va betg sut sch'in minister da l'exteriur va en l'exteriur.
In dals emprims viadis dal minister da l’exteriur era a Helsinki per suttascriver la charta da la KSZE. La diplomazia svizra è stada ferm involvida en la preparaziun da la fundaziun da la KSZE. La preparaziun ha gì lieu a Genevra.