Siglir tar il cuntegn

Header

Voatziun en ina sala.
Legenda: Prender parolas ed analisar elecziuns – a Berna e Weinfelden salvan las duas partidas SP ed EVP lur radunanzas da delegadas e delegads. Keystone
cuntegn

Politica federala Parolas ed analisas – delegadas da PS ed EVP

Las partidas naziunalas socialdemocraticas e partida evangelica svizra sa scuntrian questa sonda a lur radunanza da delegadas e delegads, scriva l'agentura da novitads svizra SDA. Tuttas duas partidas vegnan a s'occupar da parolas.

La PS analiseschia dentant er la perdita da las elecziuns naziunalas – en quellas han ils socialdemocrats pers quatter sezs en il Cussegl naziunal e trais en il Cussegl dals chantuns.

Berna: PS di 2x GEA

La radunanza da delegadas e delegads socialdemocrats a Berna è vegnida salvada la sonda per l'ultima giada sut il presidi da Christian Levrat. Il president partent propona a sia partida da guardar enavant suenter la perdita da sezs da sia partida a las elecziuns naziunalas da l’october passà.

Cun ils sezs ch’ils Verds hajan gudagnà saja la sanestra en general vegnida pli ferma, ha ditg Levrat. La PS na possia ussa betg reflectar en in stadi mez depressiv davart la posiziun da la partida. Ins spetgia plitost da la partida ina politica per ina Svizra ecologica, sociala e solidara.

En pli ha la PS decidì sias parolas per las duas votaziuns naziunalas il favrer – GEA a l'iniziativa «per dapli abitaziuns favuraivlas» e GEA a la protecziun schlargiada cunter la discriminaziun.

Weinfelden: PEV di 2x NA ed 1x libertad da vuschar

La Partida evangelica da la Svizra ha decis las parolas per trais votaziuns federalas. A sia radunanza da delegadas e delegads haja ella decis libertad da vuschar per la protecziun schlargiada cunter la discriminaziun, rapporta la SDA.

Plinavant di ella NA a l’iniziativa per dapli abitaziuns pajablas sco era a l’iniziativa da la PPS che vul limitar la migraziun.

RTR novitads 12:00+