A chaschun d'ina occurrenza a Turitg, ha il commember da la direcziun Andrea Mächler prendì posiziun davart las pretaisas da protecturas e protecturs da l'ambient. Quels vulan che la Banca naziunala svizra, influenzeschia cun sias investiziuns concerns, che han da far cun la midada dal clima.
Quai na saja dentant betg il mandat da la banca, ha ditg Mächler. La BNS stoppia stoppia esser flexibla cura ch'i va per sias investiziuns – sin basa da las finamiras da la potitica monetara. E la finamira da la BNS na saja betg da far daventar il mund pli verd. Ma, la banca na cumpria per exempel betg pli aczias dad interpresas che fan en emprima lingia affars cun minieras da charvun.
WWF pretenda midadas
Il WWF Svizra appellescha a la Finma ed a la Banca naziunala, da tschentar si in plan communabel. Quest plan duai mussar co ils ristgs finanzials da la crisa da clima e biodiversitad pon vegnir integrads e resguardads en lur agir.
La Finma duai examinar ils products da finanzas che cumparan mintg'onn sin il martgà per cumbatter infurmaziuns inexactas e greenwashing. Greenwashing è ina metoda da PR cun la finamira da dar a firmas in image verd. Quests rapports da las examinaziuns, sajan lura da publitgar e las lubientschas sajan d'adattar.
