Siglir tar il cuntegn

Header

Navigaziun

Purtret d'in taser.
Legenda: Ils tasers èn vegnids en acziun trais giadas uschè savens sco l'onn avant. Keystone
cuntegn

Svizra Polizia ha duvrà trais gia pli savens tasers

Il 2018 ha la policia duvrà 45 giadas questas pistolas cun impuls electronicc, l'onn avant eran quai be 13 giadas. Armas da fieu èn vegnidas duvradas 12 giadas.

Sco quai che la Conferenza dals cumandants da las polizias chantunalas da la Svizra scriva sin sia pagina d'internet hajan policistas e policists l'onn passà stuì far diever 12 giadas dad armas da fieu. Ils pli blers sajets haja dà sin vehichels u cunter il terren. Persunas na sajan betg vegnidas blessadas.

Il diever da tasers è dentant creschì fermamain. 145 giadas hajan policists tratg l'arma. En ils pli blers cas haja dentant tanschì da smanatschar per stabilir la situaziun. Ma en 45 cas èn ils tasers propi vegnids duvrads.

Critica dad «Augenauf»

En dus terzs dals cas sajan ils pertutgads stads alcoholisads u sut l'influenza da drogas. Er sch'il taser è vegnì duvrà per part pliras giadas durant la medema acziun, munta quai ch'il dumber è trais giadas uschè aut sco l'onn 2017.

Quest svilup vegn crititgà ferm da l'organisaziun per dretgs umans «Augenauf». Ils policists hajan adina pli paucas retegnientschas da duvrar ils tasers, ha declerà Rolf Zopf il pledader da l'organisaziun. Cun quai creschia er il ristg ch'i pudess insacura dar cas serius cun morts. L'arma saja numnadamain cler privlusa per la vita. En ils Stadis Unids hai gia dà plirs morts pervi d'acziuns cun tasers.

RR novitads 14:00