Il chantadur da dialect Polo Hofer è mort cun 72 onns. El saja mort la sonda saira a chasa ad Oberhofen al lai da Thun. «Tschou zäme, es isch schön gsy!», quai ha el scrit sez en sia annunzia da mort. «Am Samschtig, 22. Juli, churz vor Mitternacht, het mys letschte Stündli gschlage und i bi zfriede deheime ygschlafe», hai num en ina curta communicaziun da pressa che la famiglia ha tramess il glindesdi saira, dus dis pli tard.
Carriera cun «Rumpelstilz»
Polo Hofer è vegnì enconuschent cun sia band Rumpelstilz ch’el aveva fundà l’onn 1971. Cun la band ha Hofer producì, tranter auter ils dus hits en dialect bernais «Kiosk» e «Teddybär». Ma er chanzus sco «D'Rosmarie und i» e «Die gfallene Ängel». Suenter la fin da «Rumpelstilz» ha Polo Hofer l’emprim fundà «Polo’s Schmetterding» e l’onn 1984 «Polo’s Schmetterband».
La chanzun «Alperose» è vegnida undrada l'onn 2006 sco pli grond hit svizzer en l'istorgia. L’onn 2011 è el vegnì premià per sia ovra da vita cun il Swiss Music Award. E l’onn 2015 è el stà il Svizzer da l’onn.
Il cordoli è grond
Il minister da cultura Alain Berset ha onurà l’ovra da vita da Hofer e ditg che a nagin auter saja gartegià d’unir il dialect e la musica da rock sco ad el. El haja er mussà ad entiras generaziuns en tuttas regiuns linguisticas da la Svizra quanta forza, quant spiert e quanta poesia che saja avant maun en il dialect bernais.
Era blers amis artists èn sa mussads engraziaivels envers Polo Hofer. Francine Jordi ha per exempel scrit sin Facebook: «Grazia per tut las bellas chanzuns ed ils bels muments.» Marc Sway da sia vart ha discurrì dad in dals pli gronds musicists da la Svizra e Luca Hänni ha scrit sin Twitter che las grusaidas cuntinueschian a flurir per Hofer. El è sa referì sin la chanzun «Alperose» dal 1985.
RR novitads 20:00
