Siglir tar il cuntegn

Header

cuntegn

Populaziun 2020 Mintga 10avla Svizra u Svizzer viva en l'exteriur

Mintga dieschavel Svizzer u Svizra viveva l’onn passà en l’exteriur. En cifras èn quai 776'000 Svizras e Svizzers. Quai èn 0,7% dapli, cumpareglià cun l’onn avant, sco l’Uffizi federal da statistica annunzia. L’augment è però pli pitschen ch’ils onns avant. Bunamain dus terzs eran da chasa en l’Europa, ils pli blers en Frantscha.

Il pli fitg è la cumpart da persunas pensiunadas che vivan en l’exteriur creschida. Quai per 2,8%. La cumpart dals Svizzers a l'exteriur en l'Asia è sa reducida per 1%. Era en l'Africa (-2,9%) ed en l'America (-0,2%) vivevan l'onn passà damain Svizzers.

La Frantscha para d'esser popular

La pli gronda cumpart dals Svizzers a l'exteriur, pia 490'800 u 63%, vivevan il 2020 en l'Europa. 209'900, bunamain in quart, han tschernì la Frantscha so lieu d'abitar. I suonda la Germania cun bunamain 100'000 persunas, l'Italia cun 50'000, la Gronda Britannia cun 40'000 e la Spagna cun bunamain 25'000 Svizras e Svizzers.

Bleras persunas sur 100 onns

21,1% dals Svizzers en l'exteriur eran minorens (56,7%). La cumpart da persunas tranter 18 e 64 onns era tuttina gronda sco l'onn avant. Per l'augment han las senioras ed ils seniors procurà: 22,2% u 172'500 persunas che vivevan l'onn passà en l'exteriur eran pensiunads, quai èn 2,8% dapli che l'onn avant. 662 persunas, u 8 da 10'000, eran 100 onns u pli veglias. En Svizra vivan be 2 da 10'000 en questa categoria da vegliadetgna.

audio
Per tadlar: Las novitads da las 11.00 uras
ord RTR Audio dals 30.03.2021. Maletg: RTR
laschar ir. Durada: 3 minutas 5 Secundas.

RTR novitads 10:00

Artitgels legids il pli savens