- Suenter il grond fieu a Dällikon ha la Polizia chantunala da Turitg abolì l'avertiment. Per la populaziun n'existia nagin privel pli.
- Suenter ch'il clavà aveva piglià fieu, avevan las autoritads laschà ir la saira in alarm da sirena. En il clavà sa chattava fertilisader, ch'avess pudì explodir.
- La populaziun è vegnida supplitgada da restar a chasa, e da serrar barcuns e storas. Tenor la polizia chantunala n'èn naginas persunas sa blessadas.
- Daco ch'igl hà brischà, sclereschan uss spezialists ensemen cun la Procura publica dal chantun Turitg.
La sonda las 2 la damaun han las autoritads turitgaisas abolì l'avertiment en connex cun il fieu a Dällikon. I na dettia nagin privel pli. Avant aveva la polizia chantunala infurmà ch'ils donns sajan gronds, suenter ch'il clavà cun in grond magasin da fertilisader aveva brischà. Tenor la polizia n'èn naginas persunas vegnidas blessadas tras il fieu.
Dällikon è radund 17 minutas cun auto davent da Turitg e Baden
Pervi dal privel d'explosiun han ils pumpiers stuì tegnair gronda distanza dal clavà en fieu. La raschun daco ch'il grond fieu è rut ora, sclereschan experts da fieu da la Polizia chantunala da Turitg uss, ensemen cun la Procura publica turitgaisa.