Bun 2,7 milliuns persunas, u radund 38% da la populaziun che viva permanent en Svizra aveva l'onn passà ina biografia da migraziun. Tenor uffizi federal per statistica è quai in augment dad 1,3% visavi l'onn precedent. 80% da quellas persunas èn naschidas en l'exteriur ed appartegnan uschia a l'emprima generaziun (2,2 milliuns). Ils auters èn naschids en Svizra e tutgan tar la segunda generaziun. La pli gronda part da las persunas cun ina biografia da migraziun deriva da la Germania u da l'Italia, mintgamai radund 10%.
Set indicaturs davart l'integraziun en il martgà da lavur da la populaziun cun biografia da migraziun èn vegnids actualisads. Ils resultats mussan, che persunas cun biografia da migraziun da l'emprima generaziun èn tar tut ils set indicaturs mender vidlonder che persunas senza biografia da migraziun.
Segunda generaziun gia posiziunada meglier
Per exempel munta la quota da persunas senza gudogn tar l'emprima generaziun a 7%, quella è pia prest trais giadas uschè auta sco tar la populaziun senza biografia da migraziun (pli pauc che 3%). Tar la segunda u pli autas generaziuns è er mender vidlonder quai che pertutga la quota senza gudogn, la repartiziun tenor mastergn e la quota da persunas cun gudogn independent. Tar l'esser surqualifitgà, temps da lavur malregulars u posiziuns da manar na stettian quels da la segunda generaziun betg enavos.
Il status da migraziun n'è dentant betg l'unic factur per questas differenzas tranter las gruppas da populaziun. Autras variablas sco la vegliadetgna u il nivel da l'educaziun giogan er ina rolla.
Per tadlar curt e cumpact:
