Il post da cussegliaziun independent duai cumplementar ils servetschs da cussegliaziun gia existents tar l'armada, scriva il Departament federal da defensiun, protecziun da la populaziun e sport.
Las duas persunas da cussegliaziun, in um ed ina dunna, n’han betg mo in'ureglia averta per persunas ch'èn en servetsch tar l'armada, mabain era per confamigliars ed amis che na san betg a tgi sa drizzar.
Simpel, nunbirocratic e discret
Temas pussaivels sajan per exempel conflicts cun superiurs, quitads finanzials ni era problems da sanadad. Els sajan dentant averts per tuttas dumondas, accentueschan las duas persunas da cussegliaziun ch'èn bain emploiadas tar il VBS, che n'èn dentant betg suttamessas a l'armada e possian perquai era garantir ina cussegliaziun independenta e discreta, quai via telefon, internet u inscunter persunal.
