Siglir tar il cuntegn

Header

cuntegn

Posta da viadi dal Gottard Viagiar sco avant 150 onns cun la charrotscha

Dad Andermatt sur il pass dal Gottard fin ad Airolo, quai vegniva fatg avant 150 onns cun charrotscha, ma er ozendi. Otg persunas chattan plaz en la charrotscha, construida tenor plans originals. Per ch’il viadi na saja betg stentus dovri dentant blera preparaziun e lavur, avant e durant il viadi.

Ina charrotscha legendara

La charrotscha per ils viadis sur il Gottard è in Landau Coupé, bajegiada tenor ils plans originals. Sulet las rodas da lain èn vegnidas remplazzadas cun talas da metal, per motivs da durabladad e confort. La charrotscha da posta originala sa chatta ad Affoltern am Albis, en il center da collecziun dal Museum naziunal svizzer.

La Tremola, ina via aventurusa

La Tremola è ina via dal pass protegida da la protecziun da monuments. La charrotscha dal Gottard dastga duvrar ella, ensemen cun töffists, bikers e viandantas. Oriundamain era la Tremola ina via da sauma. La via dal pass dal Gottard è vegnida bajegiada dal 1826 enfin il 1832. 28 kilometers entaifer sis stads. Davent da l'onn 1830 ha la charrotscha da posta cumenzà cun ils viadis sur il Gottard, davent dal 1842 gievan la charrotscha ed ils tschintg chavals ina giada a di en omaduas direcziuns. L’enviern vegniva la charrotscha remplazzada d’ina schliuesa. Cun l’avertura dal tunnel dal Gottard, il 1882, ha la via sur il pass pers sia muntada. Il 1926 è l’ultima charrotscha ida sur il pass.

In mitus vegn reanimà

L’onn 1987 è la societad acziunara «Historische Reisepost» vegnida fundada, ed ella ha organisà in viadi da tschintg dis da Flüelen a Lugano. In viadi aventurus, la charrotscha ha pers ina da sias rodas. L’onn suenter èn vegnids purschids 13 viadis dal di d’Andermatt ad Airolo. L’onn 2010, in onn da record, èn vegnids purschids 123 viadis cun la charrotscha istorica. Per viadi vegnan otg persunas transportadas, in viadi custa 680 francs per persuna.

Ruta da viagiar:

Avrir la box Serrar la box
  • Andermatt: apéro
  • Hospental
  • Mätteli: segunda fermada
  • Brüggloch: ruta veglia dal Gotthard
  • Hospiz: gentar e museum
  • Tremola
  • Motto Bartola
  • Airolo: marenda

La Mona Lisa svizra

Maletg da l'artist Rudolf Koller da l'onn 1873
Legenda: Maletg da l'artist Rudolf Koller da l'onn 1873 Keystone
audio
Charrotscha dal Gottard: Il purtret da Rudolf Koller
02:13 min, Actualitad dals 11.08.2021.
laschar ir. Durada: 02:13 minutas.

In dals pli renumads maletgs svizzers è quel da l’artist turitgais Rudolf Koller, da l’onn 1873, che mussa la posta da viadi istorica, cun ils tschintg chavals che stgatschan in vadè. Il maletg «Gotthardpost» è per la chasa d’art Turitg quai, che la «Mona Lisa» è per il Louvre a Paris, numnadamain in magnet da public. Il maletg represchenta il svilup rasant dal traffic sur ed era tras il Gottard. L’ovra originala penda en la chasa d’art da Turitg, ina copia è da vesair en il museum dal Gottard sin il pass dal Gottard.

RTR actualitad 06:00

Artitgels legids il pli savens

Scrollar a sanestra Scrollar a dretga