Il trend tar la posta è gia dapi bunamain 20 onns bain visibel: Las cifras da brevs e cartulinas sa reduceschan. In trend che la posta Svizra observa dapi intgins onns. Tenor il post da medias da la posta Svizra transportescha la posta oz 40% pli paucas brevs e cartulinas che avant 20 onns.
L'onn passà haja la posta transportà radund 1,7 milliardas brevs. Quai munta in regress da 5,6% cumpareglià cun l'onn passà. La raschun per quel trend saja preschent en il mintgadi da nus tuts e tuttas di Léa Wertheimer, pledadra da medias tar la posta Svizra. La communicaziun succedia pli e pli fitg en moda e maniera digitala sco per exempel e-mail.
La correspundenza privata è vegnida remplazzada da la communicaziun electronica.
In'auter trend sa mussia tar ils pacs: Pervia dal commerzi online che crescha pli e pli fitg, transportescha la posta mintg'onn dapli pacs. Gist ils mais enfin Nadal vegn mintga di transportà passa in milliun pacs.
La cifra da brevs e cartulinas transportadas il december resta en la media normala d'in mais.
Dentant sa mida la cumposiziun da la spediziun: Las spediziuns commerzialas sa reduceschian in pau e surtut vegnia tramess dapli brevs e cartulinas da persunas privatas a persunas privatas. Surtut la davos'emna dal december sa midia la cumposiziun enormamain.
La davos'emna dal december transportescha la posta dubel uschè bleras brevs e cartulinas privatas sco il rest da l'onn.
Ina raschun per quella midada è tenor Léa Wertheimber che blers uffants scrivian ina brev al bambin. Surtut en la Svizra taliana e franzosa saja quai ina tradiziun. Ed i para che tuttina inqual in as prenda durant il temp da Nadal la peda per trametter salids a ses chars e sias charas en moda e maniera tradiziunala – e forsa era in zichel nostalgica – cun la posta.
Passantas e passants a Cuira
Ina retschertga na represchentativa en las giassas da Cuira. I dat pia differentas chaschuns che la glieud scriva tuttina anc salids persunals a maun ed als trametta cun la posta. I na vegn betg tramess sulettamain chartas da Nadal. Posta privata para tenor ils passants e las passantas a Cuira dad avair ina gronda valur.