Posta Svizra - Schef da concern pretenda dapli libertad d'interpresa
La Posta Svizra vul dapli libertad d'interpresa per garantir davent dal 2030 il servetsch public. En il futur duain pli savens era prestaziuns digitalas vegnir integradas en il provediment da basa. Quai ha ditg il schef da concern, Roberto Cirillo, tar in discurs da medias virtual.
Quints mussian, che la Posta na possia betg pli sa finanziar sezza davent dal 2028. La communicaziun vegnia pli digitala, i dettia damain brevs – ed il dumber creschent da pachets pretendia investiziuns. Cirillo è sa referì sin in rapport davart la Posta suenter il 2030, preschentà avant var in'emna.
Tenor Cirillo gioga il servetsch postar er suenter il 2030 anc ina rolla impurtanta – «dentant dapli en furma digitala». La Posta veglia perquai investir tant en il servetsch public digital, sco er analog. Er en futur veglian els vegnir or senza daners da taglia.