Postfinance stritga definitivamain 45 plazzas

Pervia da digitalisaziuns ed automatisaziuns stritga la Postfinance proxim onn 45 plazzas. Ulteriuras 208 plazzas èn pertutgadas da transferiments da lieus da fatschenta.

Il logo da la Postfinance sin ina filiala. Bild in Lightbox öffnen.

Legenda da maletgs: La Postfinance stritga proxim onn definitivamain 45 plazzas. Keystone

La Postfinance maina a fin sia reducziun da plazzas. En la procedura da consultaziun ch'è entant terminada, n'haja dà naginas propostas che pudessan remplazzar las mesiras planisadas. Il proxim onn vegnan uschia 45 plazzas stritgadas, quai pervi da automatisaziuns e digitalisaziuns. La reducziun da plazzas duai succeder tant sco pussaivel cun fluctuaziuns natiralas e senza relaschar glieud.

208 plazzas pertutgadas da transferiments

Ultra da quai vegnan serrads la fin da zercladur dal 2018 ils lieus da fatschenta da Kriens LU e Münchenstein BL. Il center da contact da Son Gagl duai vegnir integrà sin la fin dal 2018 en quel da Netstal GL. Tenor indicaziuns da pli baud sajan var 208 impiegads pertutgads dals transferiments. Ad els vegnia la Postfinance ad offrir novas plazzas da lavur. 120 ulteriurs impiegads vegnan sin l'entschatta da mars dal 2018 transferids da la Postfinance a la Swiss Post Solutions, ina filiala da La Posta.

Tractativas cun Syndicom e Transfair

Per il mument tracta la Postfinance ils pass concrets dals transferiments dals lieus da fatschenta cun ils sindicats Syndicom e Transfair. Sco Postfinance declera en ina communicaziun a las medias, sajan ils discurs enfin ussa stads constructivs. Cura che las tractativas sajan serradas giu, vegnia la Postfinance ad infurmar ils impiegads e la publicitad.

RR novitads 10:00