La raschun saja la lescha che permettia a roboters dad ir tras citad be sch'ina persuna accumpogna els. Quai n'haja nagin senn, ha ditg la responsabla per il svilup e l'innovaziun da La Posta en ina intervista cun la «Neuen Zürcher Zeitung». La Posta saja en tractativas cun l'Uffizi federal da vias per stgaffir meglras cundiziuns da basa. Il 2016 aveva La Posta testà ils roboters sco ina da las emprimas interpresas en l'Europa per sias spediziuns.
Problems e sceptica
Tenor il rapport final da La Posta hai er dà incaps cun ils roboters autonoms. Per part n'avessian roboters betg pudì ir sur la strivla melna vi ad uras senza l'agid da lur accumpagnader – l'ampla dals autos saja gia stada sin verd. Er sin il passape na plaschan ils pots cun motor betg a tuts. La federaziun da pedunas e peduns svizra ha inoltrà l'onn passà ina petiziun. En quella pretenda la federaziun ch'i na dat nagins vehichels da motor sin il passape – pia er nagins roboters che repartan pachets.
Tests cuntinueschan endadens
Per il mument repartan ils roboters da La Posta be tar l'interpresa sezza pachets. En gronds bajetgs nua ch'i sto vegnir fatg lungs tschancuns pudessan roboters esser ina buna soluziun, di Claudia Pletscher da La Posta.
RR novitads 06:00