En Svizra vivan spezialmain bleras famiglias stgars sur il cunfin da la povradad. Quai mussa in’enquista da la Caritas. L’ovra d’agid pretenda che famiglias, ch'han stgars daners per viver, vegnian sustegnidas pli ferm. Sch’ins auzass la definiziun dal cunfin da la povradad per 500 francs, sa dublass il dumber da las persunas pertutgadas da la povradad, mussa l’enquista che la Caritas ha fatg cun la scola auta spezialisada da Berna.
Surtut famiglias ch'èn pertutgadas
Tenor l’Uffizi federal da statistica eran il 2020 radund 722’000 persunas pertutgadas da la povradad en Svizra. Quai èn 8,5% da la populaziun. Questa cifra è anc d'avant la pandemia. Surtut famiglias sajan pertutgadas, perquai ch'uffants muntan era pli pauc entrada e dapli expensas. Ina famiglia da quatter persunas ha tenor questa calculaziun 3'900 francs per mais a disposiziun. Cun quai sto la famiglia pajar tut quai dal mintgadi, sco era il fit da l'abitaziun. Sche la famiglia avess 50 francs dapli a disposiziun, na valess ella betg pli sco pover. Era sche l'entrada è in zic pli auta ch'il minimum d'existenza en l'agid social, na datti nagin dretg sin quest sustegn.