Siglir tar il cuntegn

Header

Navigaziun

Purtret dad Ueli Maurer.
Legenda: Ueli Maurer ha exprimì cler e bain ch'el na va betg d'accord cun la cunvegna da basa ch'è en consultaziun. Keystone
cuntegn

Svizra PPS ha elavurà catalog da pretensiun per cunvegna da basa

Ils delegads han vuschà a la radunanza unanim per in catalog da pretensiuns che duai evitar che la Svizra vegnia suttamessa a l'UE.

La cunvegna da basa duai fixar co la Svizra surpiglia novas midadas dal dretg da l'Uniun europeica. Fin zercladur è la cunvegna en consultaziun, ha declerà il cusseglier federal Ueli Maurer. Il Cussegl federal na saja betg cuntent cun il contract elavurà fin uss.

La suprastanza da la partida ha preschentà als delegads 13 pretensiuns davart la cunvegna da basa: Tar punct 3 per exempel vegn pretendì ch'il Cussegl federal na po betg suttascriver in contract che stat en cuntradicziun cun la Constituziun sco era in contract ch'acceptia «derschaders esters» respectiv il Tribunal europeic. Ils delegads han vuschà unanim per quellas pretensiuns.

L'Uniun europeica cumonda

La cunvegna da basa saja in'attatga frontala sin la Svizra ha ditg Albert Rösti, il president da la partida. Ella saja la fin da la via bilaterala. El ha discurrì d'in contract che sforzia la Svizra da sa suttametter. Las consequenzas per la Svizra fissan anc dapli immigraziun, squitsch da pajas e prestaziuns socialas memia charas. Be la PPS sa mettia entant anc encunter la cunvegna da basa.

L'UE cumonda e nus duain far per cumond e taschair.
Autur: Roger KöppelCusseglier naziunal ZH

Purs fissan ferm pertutgads

Quest contract è in corset che vegn tratg en a nus.
Autur: Magdalena Martullo-BlocherCussegliera naziunala GR

Cun la cunvegna da basa s'obligheschia la Svizra da surpigliar il dretg da l'UE dad oz e dal futur. Ils purs fissan fitg ferm pertutgads da la cunvegna cun l'UE. Martullo-Blocher ha declerà, ch'ils pajaments directs na fissan uschia betg pli pratitgabels.

Novas strategias

La PPS da l'Argovia nua che la radunanza da delegads ha lieu, è la secziun da parada da la PPS. Els han pudì survegnì durant las ultimas elecziuns dal Cussegl naziunal 39,3% da las vuschs e tar las ultimas elecziuns per il cussegl chantunal han els gì ina cumpart da 32,6% da las vuschs.

Nus essan las unfrendas da noss agen success
Autur: Albert RöstiPresident da la PPS

Als Verds saja reussì da mobilisar a Turitg bler dapli electurs d'ir a votar. Els n'hajan betg dumagnà d'activar lur basa. Sch'els na sa desdian betg uss, lura na vegnia la partida betg pli da volver il timun per las elecziuns naziunalas da l'atun – lura vegnia la bainstanza da la Svizra ad erodar, ha ditg Rösti.

Plum a Turitg

Venderdi ha la secziun chantunala da Turitg purtà las consequenzas per ses schlet resultat. L'entira direcziun da la PPS è sa retratga. Il giavisch per novs chaus en la direcziun da la partida saja vegnì da la suprastanza da la partida.

Las parolas

La PPS Svizra na dat ora nagina parola per la lescha federala davart la refurma fiscala e la finanziaziun da l'AVS. La radunanza da delegads ad Amriswil, chantun Turgovia, è suandada la proposta da la suprastanza da partida. Dar liber la vusch saja in cler signal ch'els n'approveschian betg da colliar las duas chaussas, ha ditg il president da partida Albert Rösti. La parola NA han la radunanza decidì per il dretg d'armas pli sever. L'UE ha engrevgià la lescha d'armas suenter las attatgas terroristicas il november 2015 a Paris.

La dumonda sch'er Christoph Blocher, la figura dominanta da la partida haja gì in'influenza sin questa decisiun, ha il president da la secziun Turitg, Konrad Langhart respundì a l'Agentura da novitads svizra, cun: «Signur Blocher ha segir fatg valair sia influenza». Blocher sez n'ha betg vulì pigliar posiziun.

RR novitads 14:00+