Malgrà che la Partida populara svizra n'è betg cuntenta cun proposta per realisar l'iniziativa na profitescha ella tuttina betg d'in referendum. La PPS na crai numnadamain betg ch'il parlament vegnia ad approvar pli tard ina lescha pli rigurusa, ha Rösti declerà la decisiun. En ina sesida saja la direcziun da la partida sa decidida cleramain cunter in referendum.
Differenzas en il parlament
Tar la realisaziun da l'iniziativa datti vinavant differenzas tranter il Cussegl naziunal ed il Cussegl dals chantuns. I dat anc discussiuns davart quant auta che la quota da dischoccupaziun stoppia esser enfin ch'ins prendia mesiras a favur dals dischoccupads e tge obligaziuns ch'ils patruns svizzers hajan. La votaziun finala en il parlament è previsa la fin da l'emna che vegn. Fin ils 9 da favrer 2017 sto l'iniziativa vegnir realisada. Quai pretenda l'artitgel da constituziun davart l'iniziativa.
RR novitads 6:00