Siglir tar il cuntegn

Svizra PPS resta la pli ferma, ed il liberalissem para da renascher

Sche la Svizra avess elegì il parlament il zercladur, lura avess la PPS vinavant las pli bleras vuschs cun 26.1%. Cumpareglià cun las elecziuns dal 2011 avess gudagnà la PLD, laschà plimas avessan la PBD e la PES. Quai resulta da la retschertga da l'institut gfs.bern per la SSR.

Legende: Video Barometer d'elecziuns: PPS resta ferma, PLD fa sigl ensi abspielen. Laufzeit 2:24 Minuten.
Or da Telesguard dals 24.06.2015.

PLD è il magnet per l'electorat da la PPS

Ils Liberaldemocrats (PLD) han per la segunda giada en roda pudì gudagnar ils pli blers puncts tar las retschertgas. Tar l'ultima retschertga avevani gudagnà 0,5%, ed ussa in'ulteriura giada 0,8%, uschia ch'i tegnan la cumpart da 17,1% da l'electorat. Quai ch'è remartgabel dapli che tar las elecziuns 2011 cun 15,1%, e l'emprima giada che la PLD augmentassia sia procentuala a las elecziuns dapi il 1979.

La retschertga

Per il barometer d'elecziuns da la SRG SSR ha l'institut gfs.bern interrogà 2'009 persunas cun dretg da votar en Svizra. Quai tranter ils 1 ed ils 12 da zercladur 2015. Il sbagl da prova è tar +/- 2,2%.

Quai è tenor l'institut gfs.bern remartgabel. Surtut para l'uschènumnada «affera dal Kasachstan» betg da donnegiar la PLD, malgrà che la cussegliera naziunala liberaldemocratica Christa Markwalder è en il center da l'affera. Ils gudogns da la PLD van surtut sin donn e cust da la PPS, però era da la PVL e da la PBD.

PPS anc adina la partida la pli ferma

Vinavant las pli bleras vuschs survegn la Partida populara svizra (PPS). Cumpareglià cun l'ultim barometer (mars 2015) ha ella bain pers 0,1% - cumpareglià cun il barometer da l'october 2014 cun (24,6%) ha ella gudagnà.

Ella è però anc adina lev sut ils resultats da las elecziuns avant 4 onns, nua che la PPS ha persvadì 26,6% da las electuras e dals electurs da la eleger.

PS perdess lev

Pers la segunda giada en roda avessan ils Socialdemocrats (PS). Suenter la perdita d'in mez punct tar l'ultima retschertga, perda la PS questa giada ulteriurs 0,3% e fiss cun 19,3% la segund ferma partida en il parlament svizzer. Cumpareglià cun las ultimas elecziuns fiss quai però anc adina in gudogn. Lezza giada avevan els survegnì 18,7% da tut las vuschs.

PCD resta en il minus

Levet ida enavos è la cumpart che la Partida cristiandemocratica (PCD) pudess persvader. Suenter ch'ella aveva anc gudagnà 0,6 puncts tar l'ultima retschertga, perda'la ussa puspè 0,3 puncts e cumulescha 11,5% da l'electorat. Quai ch'è damain ch'ils 12,3% che la PCD tegn en il parlament dapi las ultimas elecziuns.

Duscha fradaglia per PVL

Il trend engiu continuescha tar la Partida verd-liberala (PVL). Suenter avair pers en l'ultima retschertga 1,7 puncts, perda ella ulteriurs 0,8 puncts e cumpigliass anc la cumpart da 4,8% da l'electorat.

grafica da lingias
Legenda: Il svilup da las partidas da las elecziuns dal 2011 sur ils differents barometers d'elecziun da la SSR. RTR, C. Gartmann

PES minus cun tema perdì

0,1% han pers ils Verds (PES) sin l'ultim barometer e munta ina cumpart da 7,4%. Cumpareglià cun las ultimas elecziuns fiss quai ina perdita totala da 1,0 sin il resultat avant 4 onns.

Questas perditas resultan tenor gfs.bern cleramain da la flaivlezza da mobilisar tar ils Verds. Las vuschs dals Verds na migreschian betg tar autras partidas.

PBD vinavant cun trend negativ

Era permanent sin la via engiu è la Partida burgaisdemocratica (PBD). En l'ultima retschertga anc cun 4,6% - pia in minus da 0,2 puncts - uniss la PBD anc 4,4% en la retschertga actuala.

Las raschuns per las perditas n'èn tenor gfs.bern betg cleras. La PBD perda en mintga cas vuschs che van tant a la PS sco era a la PLD.

RR novitads 17:00