Libertad, independenza ed autodeterminaziun – quai duain esser ils temas centrals per las elecziuns dal 2019. La Partida populara svizra veglia cuntanscher almain uschè bleras vuschs sco il 2015. Là ha la PPS cuntanschì stgars 30% da las vuschs. Dà ina midada hai durant la radunanza da delegads tar la famiglia Blocher. Albert Rösti resta president per ulteriurs dus onns.
La figlia surpiglia il post dal bab
Magdalena Martullo-Blocher è vegnida elegida sco vice-presidenta da la partida. Quai cun 354 vuschs. Bandunà il comité ha ses bab, Christoph Blocher, cun 77 onns. Il post da Blocher sco manader da las elecziuns 2019 surpiglia il cusseglier naziunal bernais, Adrian Amstutz.
Lain scuvrir malcunvegnientschas. Pigliain a maun, faschain urden, per che la Svizra restia Svizra.
A la radunanza ha la partida cun ils pli blers votants era lantschà las elecziuns. En quel èn libertad, independenza ed autodeterminaziun ils puncts ils pli impurtants.
Regurdientschas a l'EWR
Il schef da la campagna d'elecziun, Adrian Amstutz ha discurrì d'ina «Classe politique» che mainia en l'Uniun europeica. L'incumbensa per las elecziuns saja da diminuir las «partidas che cuntrafan a la Constituziun» da mez e sanester. Ils garants da la democrazia e l'independenza stoppian vegnir pli ferms.
Er l'anteriur cusseglier federal, Christoph Blocher ha prendì il pled a la radunanza da delegads a Claustra. El ha avertì d'ina fin da la democrazia. Avant 25 onns, avant la votaziun davart l'EWR hajan ins gì la medema situaziun sco oz.
Nus stuain arver ils egls al pievel svizzer.
Blocher ha plinavant discurrì d'in culp da stadi (Staatsstreich) en il qual il Cussegl federal, il parlament ed ils derschaders federals sajan involvids. Els mettian dretg internaziunal davant dretg svizzer. En ses pled ha Blocher er duvrà il pled «sindicat da cugliuns».
Il president da la partida, Albert Rösti ch'è reelegì per ulteriurs dus onns en uffizi, è s'exprimì absolutamain cunter ina cunvegna da basa cun l'UE. La suveranitad da la Svizra na possia betg vegnir restrenschida.
RR novitads 15:00