Siglir tar il cuntegn

Svizra Praschun per participaziun ad organisaziun da terror

Il Tribunal federal ha confermà il chasti per in Iracais ch'aveva planisà ensemen cun ulteriuras persunas davent da la Svizra ora in attentat.

Chasa dal Tribunal federal a Losanna.
Legenda: Tribunal federal ha confermà chasti da praschun per participaziun ad organisaziun terroristica. Keystone

Il mars 2016 aveva il Tribunal penal federal condemnà l'Iracais a 4 onns ed 8 mais praschun pervi da participaziun ad ina organisaziun criminala. Suenter ch'il Tribunal federal aveva renconuschì parzialmain in recurs il mars 2017, ha il Tribunal penal federal reducì il chasti per in onn.

Il Tribuna federal ha uss confermà che il Tribunal penal haja decidì correct davart la dimensiun dal chasti. Il Tribunal federal ha refusà il recurs da l'um. Quel aveva pretendì ch'i na saja betg stà gist, che la preinstanza haja valità ses falliment sco grev. Ultra da quai aveva el crititgà ch'il tribunal n'haja betg resguardà il resun en las medias avant e durant il process per la fixaziun dal chasti.

Quests arguments n'ha il Tribunal federal betg laschà valair. Gist perquai ch'il falliment saja stà grev, saja er chapaivel ch'il Tribunal penal federal haja approvà in interess legitim da la publicitad vi dal process.

RR novitads 14:00