La gronda part da las munaidas èn dal temp dal segund tschientaner suenter Cristus. La pli veglia munaida è dal temp da l’imperatur Nero vers 60 suenter Cristus, la pli giuvna dal temp da l'imperatur Commodus. Las munaidas sajan en in fitg bun stadi, per part frestg imprimidas.
Paja d'in mez onn per in legiunari
La valur da las munaidas saja considerabel, stettia en la communicaziun dal servetsch archeologic. El haja correspundì a la paja d'in mez onn dad in legiunari. Quant che las munaidas valian oz na possian ins betg schazegiar, ha declerà l'archeolog chantunal da Basilea, Reto Marti. Ellas sajan unicas e betg da vender, ha el declerà sin dumonda.
Nagut spectacular
Il chat en in guaud saja ord vista dad oz betg fitg spectacular. Ils archeologs supponan ch’il possessur roman haja zuppà aposta la munaida. A Pratteln èn enconuschents dus bains purils. Nà dad in da quels dus avess il possessur adina pudì tegnair in egl sin ses stgazi.
Las munaidas vegnan ussa restauradas e definidas pli exact. Suenter duain ellas vegnir exponidas en il museum da Basilea-Champagna a Liestal.
Ord l'archiv:
Il 2018 han ins chattà radund 300 munaidas romanas a Como. Lezzas munaidas han gì ina valur da plirs milliuns euros.
RR novitads 15:00