La fin dal 2017 han ins dumbrà en Svizra 1,7 milliuns edifizis d'abitar. Quai èn 96'000 edifizis ubain 6% dapli che set onns avant. Il dumber d'abitaziuns è s'augmentà en quel temp per 10% sin 4,5 milliuns. Quai mussan las las novas datas da l'Uffizi da statistica ch'èn vegnidas publitgadas il venderdi.
Grondas differenzas regiunalas
Er sch'igl è vegnì bajegià proporziunalmain dapli chasas da pliras famiglias, domineschan cun ina cumpart da 57% da tut ils edifizis d'abitar anc adina las chasas d'ina famiglia. Regiunalmain datti però grondas differenzas.
Uschia han ils chantuns Glaruna, Basilea-Champagna e Tessin cun radund 70% las pli autas cumparts da chasas d'ina famiglia. Percunter èn en ils chantuns Basilea Citad e Sutsilvania damain che 40% da tut ils edifizis d'abitar chasas d'ina famiglia. En media vivan en Svizra en bunamain la mesadad da las chasas d'ina famiglia mo ina u duas persunas.
Dapli spazi d'abitar per Svizzers
Sco igl resorta da la statistica d'edifizis e d'abitaziuns è l'abitaziun da media en Svizra 99 meters quadrat gronda ed ha 3,8 stanzas. La surfatscha d'abitar per persuna munta en media per chasadas cun persunas Svizras a 44 meters quadrat – per chasadas cun persunas da l'exteriur èn quai mo 31 meters quadrat.
RR novitads 15:00