«Blackbird Blackbird Blackberry» è il meglier film svizzer 2024. La co-producziun svizra-georgiana ha gudagnà venderdi saira il «Premi Quartz» a Turitg. Il film da la reschissura georgiana Elene Naveriani era nominà quatter giadas per il premi da film svizzer. En trais categorias han ils responsabels dal film pudì prender encunter ina trofea da quarz. Sper quella sco meglier film era quellas per il meglier script e la megliera montascha.
En il film Blackbird Blackbird Blackberry vai per ina dunna da 50 onns che vegn or d'in pitschen vitg georgian. La dunna sto sa decider tranter ina relaziun ed ina vita independenta.
«Die Anhörung» è meglier film documentar
Sco meglier film documentar è vegnì undrà «Die Anhörung» da Lisa Gerigs. Il film davart il sectur d'asil svizzer documentescha las proceduras d'audiziun da quatter persunas. Las dumondas d'asil da las persunas eran tuttas vegnidas refusadas.
Premis per Ella Rumpf e Karim Barras
Il premi sco meglra actura è ì ad Ella Rumpf per sia prestaziun en il film «Le théorème de Marguerite». L'actura mez svizra mez franzosa aveva gia il favrer survegnì in premi César en Frantscha. Sco meglier actur è vegnì onurà Karim Barras. L'actur svizzer-franzos vegn onurà per sia rolla en il thriller da boxists «Bisons».