Siglir tar il cuntegn
Inhalt

Svizra Premias da cassa da malsauns creschan en GR per 1,9%

La Confederaziun mida il model da calcular ils custs da la sanadad publica. Per consequenza crescha la premia media l'onn 2019 per tut ils assicurads intermediarmain per 1,2% en Svizra. Pervi da la nova moda da calcular pon ins dentant mo cumparegliar cun resalvas.

Legende: Audio Mezdi: Premias creschan ma betg per tuts tuttina abspielen. Laufzeit 03:00 Minuten.
03:00 min, Actualitad dals 24.09.2018.
  • Giuvens creschids grischuns ston pajar bun 35 francs pli pauc.
  • Uffants e creschids però ston pajar circa 3% dapli.
  • Cun il midament da calcular las premias, pon ins cumparegliar las premias dal 2018 e 2019 mo cun resalvas.

En il Grischun pajan giuvens creschids il mais bun 35 francs pli pauc per la premia da la cassa da malsauns. La media svizra è tar 50 francs. Quai vul dir che per persunas tranter 19 e 25 onns sa sbassa la premia per bunamain 16%. La raschun è ch'il parlament ha decis da distgargiar ils giuvens creschids cun adattar la cumpensaziun da ristg.

Auter vesa la situaziun or tar uffants e creschids: Pervia da l'adattaziun tar ils giuvens crescha la premia per creschids ed uffants grischuns per circa 3%, la media svizra è tar 2,4%. Uschia s'augmenta la premia media per uffants sin 87 francs il mais.

Federaziun da medis svizzers beneventa l'augment moderà

La Federaziun dals medis svizzers – FMH – beneventa il fatg che las premias da las cassas da malsauns creschan damain ch'annunzià avant plirs mais. Sco ella scriva en ina communicaziun, sajan ils 1,2% pli datiers al svilup dals custs reals tar las assicuranzas da malsauns. In potenzial per spargnar custs vesa la FMH tranter auter tar ina reducziun da la lavur administrativa e tar in rinforz dal provediment ambulant.

La nova moda da calcular las premias

La nova metoda da calcular remplazza la metoda da fin uss. Quai ha l'Uffizi federal da sanadad publica communitgà oz. La premia media è il in tras l'auter da quai ch'ina persuna paja. Cunquai reflectescha la premia media meglier las premias ch'ins sto effectivamain pajar che la premia da standard, uschia la communicaziun. La premia da standard valeva mo per creschids cun ina franschisa da 300 francs e garanzia dals custs d'accident. Mo mintga tschintgavla persuna elegia questa premia e perquai n'è quella betg pli represchentativa.

Quant stos jau pajar il 2019?

Personen-Box aufklappenPersonen-Box zuklappen

L'Uffizi federal da sanadad metta a disposiziun in quintader da premias. Là pudais Vus calcular Vossa premia per l'onn proxim. Cliccar qua per il quintader da premias, il link avra en ina nova fanestra.

Las premias dals onns 2019 e 2018 pon ins mo cumparegliar cun resalvas. L'augment da 1,2% da la premia media per l'onn 2019 è però marcant sut la media dals ultims onns. Dapi il 2008 è quella creschida en media per 3,5%.

RR actualitad 12:00