Siglir tar il cuntegn

Header

video
Ignazio Cassis: «La pandemia ans ha separà, ma na vegn betg ad ans divider»
Or da RTR Social dals 08.12.2021.
laschar ir. Durada: 32 Secundas.
cuntegn

President 2022 Cassis: «Pandemia ans ha separà, ma ans na vegn betg a divider»

  • L'onn che vegn è Ignazio Cassis il president da la Confederaziun. El succeda a Guy Parmelin.
  • Cassis è vegnì elegì cun 156 vuschs, cumpareglià cun auters onns è quai in resultat mediocher.
  • Alain Berset è vegnì elegì sco vicepresident per il 2022 e daventa uschia probablamain il 2023 president da la Confederaziun.

Il 2022 daventa il liberaldemocrat per l'emprima giada en sia carriera president da la Confederaziun. L'Assamblea federala plenara ha elegì il Tessinais da 60 onns, quai cun 156 da 197 vuschs. 14 vuschs ha la ministra da giustia Karin Keller-Sutter survegnì, 11 il minister da sanadad Alain Berset e 16 ulteriuras vuschs èn idas a diversas persunas. 36 cedels da vuschar èn stads vids e 4 betg valaivels.

Resultat mediocher

Cumpareglià cun auters onns è il resultat da l'elecziun stà sut la media. Il president da la Confederaziun actual, Guy Parmelin aveva survegnì 188 da 202 vuschs valaivlas. Il mender resultat d'enfin qua ha la cussegliera federala da la Partida socialdemocrata Micheline Calmy-Rey fatg, quai cun 106 vuschs. Il meglier resultat ha cusseglier federal da la Partida populara Ueli Maurer cuntanschì il 2018, cun 201 vuschs.

5avel Tessinais a la testa

Ignazio Cassis è il 5avel Tessinais che presidiescha la Confederaziun dapi il 1848. Il davos è stà Flavio Cotti, il cusseglier federal da la Partida cristiandemocrata. Lez è stà ils onns 1991 e 1998 president da la Confederaziun.

Alain Berset probabel 2023 president

L'um da 49 onns dal chantun Friburg e minister da sanadad Alain Berset daventa vicepresident da la Confederaziun. Il socialdemocrat è vegnì elegì cun 158 vuschs. Cunquai daventa el probablamain il 2023 president da la Confederaziun.

Alain Berset
Legenda: Alain Berset daventa vicepresident da la Confederaziun Berset è vegnì elegì il 2011 en il Cussegl federal. Lura è el succedì a sia collega da partida Micheline Calmy-Rey. Dapi il schaner 2012 è el parsura dal Departament federal da l'intern. Il 2018 è el gia stà president da la Confederaziun. Keystone

RTR novitads 14:00

Artitgels legids il pli savens

Scrollar a sanestra Scrollar a dretga