Siglir tar il cuntegn
Inhalt

Svizra President da la PS crititgescha Cassis

Christian Levrat ha a la radunanza da delegads da la Partida socialdemocratica prendì il minister da l'exteriur en il visier. Ed il president da la Confederaziun, Alain Berset, ha defendì il project da taglia 17.

Christian Levrat.
Legenda: Il president da la partida, Christian Levrat, ha attatgà il minister da l'exteriur, Ignazio Cassis. Keystone

A la radunanza extraordinari ad Olten ha il president da la partida social-democratica, Christian Levrat, prendì en il visier il minister da l’exteriur, Ignazio Cassis. Levrat ha crititgà la lavur da Cassis en il rom da la radunanza plenara da ONU a New York. Plinavant veglia Cassis midar l’entira politica exteriura ed haja perquai creà ina gruppa da lavur che cumpiglia però be represchentants da l’economia. Uschia na giaja quai betg, ha Levrat ditg.

Berset defenda pachet fiscal

Il president da la Confederaziun, Alain Berset, è en ses pled gist passà al punct principal da la radunanza da delegads, numnadamain a la lescha federala davart la refurma da la taglia e la finanziaziun da l'AVS – er numnà project da taglia 17. Quella lescha na saja ord punct da vista socialdemocratic betg ideala. I na saja però betg pussaivel d'obtegnir ina meglra, ha ditg Berset.

Sch'ins n'acceptia uss betg il pachet, sche stoppian ins pli tard s'agitar, ch'ins haja manchentà ina schanza. La consequenza fissan renfatschas d'avair flaivlentà l'AVS. La politica funcziunia sulettamain cun cumpromiss ed il project da taglia 17, saja in bun cumpromiss.

RR novitads 14:00