Siglir tar il cuntegn

Svizra President da regenza tessinaisa vul serrar cunfins

Il dumber da requirents d'asil che cuntanschan il chantun Tessin saja creschì marcantamain ils ultims dis, ha ditg il president da la regenza Norman Gobbi.

guardia da cunfins
Legenda: Ils cunfins en il Tessin duain vegnir serrads ad interim per far squitsch sin auters stadis da far lur obligaziun. Keystone

Sche quai chatsch restia uschia, stoppian els serrar ad interim ils cunfins. Uschia vegn cità Gobbi en la gasetta «NZZ am Sonntag». Sulettamain uschia possia la Svizra far squitsch sin auters pajais che na fetschian betg lur obligaziun. En chaussa asil saja il Tessin facticamain il cunfin en il sid da la Germania, ha ditg Gobbi.

Da la confederaziun pretenda Gobbi vinavant dapli guardias da cunfin. El na saja betg ni cunter la cunvegna da Schengen, ni cunter l’ordinaziun da Dublin uschè ditg che quellas funcziunian. Be ch’ellas na funcziunian il mument betg.

Ils blers fugitivs che vegnian quests dis da l’Italia en il Tessin derivan da l’Eritrea, Somalia, Nigeria e Gambia, sco che la gasetta scriva. Tge che crodia en egl è che relativamain paucs Sirians dumondian asil en il Tessin.

RR novitads 12:00