Cura ch'ils pazients da risg èn vaccinads, crodan davent radund trais quarts da las ospitalisaziuns.
Quai ha ditg Vogt venderdi saira en la «Tagesschau» da SRF. Quai muntia ch'ins possia viver cun dumbers da radund 20'000 fin 30'000 infecziuns a di, senza ch'il sistem da sanadad vegnia surdumandà. Per cumparegliar: La fin october 2020 è il dumber il pli aut da la segunda unda stà tar 10'500 infecziuns en in di.
Il ristg per decurs da corona grevs e cun quai il privel per in sistem da sanadad surdumandà, sa sminueschia massivamain uschespert che la gruppa da risico saja vaccinada, ha declerà Vogt. Lura stoppia il Cussegl federal schluccar bler pli svelt las mesiras.
Squassà il chau
Questas valitaziuns da Vogt han chaschunà ch'il vicepresident da la taskforce scientifica da la Confederaziun ha be pudì squassar il chau. Cun 30'000 infecziuns a di chaschunass quai ch'il sistem da sanadad vegniss surdumandà ed er las vias d'infecziun dessan cumplettamain ord controlla, er sche la gruppa da ristg fiss vaccinada, ha accentuà Urs Karrer en il medem rapport da televisiun.
Sco schef da clinica da l'ospital chantunal a Winterthur vesia el gia oz – cun cifras d'infecziun 10 giadas pli pitschnas – che mintga segund pazient sin ina staziun intensiva n'è nagin pazient da ristg. Dus da 1'000 persunas en la vegliadetgna da 50 onns, moran vi dal coronavirus, 3%-4% sa tschentan en l'ospital.
