En ses pled da Bumaun ha la presidenta da la Confederaziun Viola Amherd appellà a la responsabladad cuminaivla ed a la voluntad da crear e furmar. «Sin questa idea sa basa nossa democrazia», ha ditg Amherd glindesdi.
Ensemen saja vegnì dumagnà bler, quai saja la fermezza da la Svizra. «Nus n'essan betg malsagidaivels, betg senza pussanza, nus na stuain betg mo seser e guardar tiers. Bler pudain nus prender sezs enta maun», ha ditg Amherd l'emprim di en sia nova funcziun sco presidenta.
«Nus tuts decidain tge curs che l'istorgia prenda.» Ins stoppia dentant s'engaschar e surpigliar responsabladad. Tadlar, chapir in l'auter, accumpagnar in l'auter saja central. «Cudeschs documenteschan nossa istorgia, per che nus possian emprender or dad ella», ha ditg Amherd.
Displaschaivlamain hai dà eveniments, dals quals ins aveva sperà ch'els appartegnian al passà. Tar bunas istorgias tutgavan eroxas ed eroxs che prendan decisiuns curaschusas.
Amherd era vegnida elegida dal parlament ils 13 da december sco presidenta da la Confederaziun. La Vallesana remplazza Alain Berset.
