Per l'emprima giada dapi in tschientaner surpiglia la Partida socialdemocrata il presidi da Soloturn. En l'elecziun decisiva ha Stefanie Ingold (PS) fatg dapli vuschs ch'il liberaldemocrat Markus Schüpbach. La manadra da scola da 54 onns ha survegnì 3'649 vuschs. Il president da l'Assicuranza d'edifizis dal Soloturn ha tratg la curta cun 3'369. Gia en l'emprim scrutini ha Ingold fatg stgars dapli vuschs che ses contrahent.
Betg pli candidà ha il president en uffizi Kurt Fluri (PLD). El è stà durant 28 onns president da la citad da Soloturn. Dapi il 2003 fa il politicher er part dal Cussegl naziunal.
Nagin dretg da vuschar per persunas estras
En il chantun Soloturn n'ha il dretg da vuschar facultativ per persunas da l'ester gì nagina schanza. Il suveran ha refusà cleramain l'iniziativa da la PS e dals Verds. L'iniziativa vuleva midar la constituziun: Las vischnancas avessan gì da survegnir la cumpetenza da decider sezzas davart il dretg da vuschar per persunas cun la permissiun da domicil. Il parlament aveva refusà l'iniziativa – la regenza era persuenter.
Il Grischun enconuscha gia il dretg da vuschar per esters: Las vischnancas pon decider sch'ellas vulan introducir quel u betg.