Damai che Eva Herzog è dal chantun Basilea-Citad ed Eric Nussbaumer da Basilea-Champagna, fan ils dus politichers socialdemocrats ina festa cuminaivla per lur elecziun. Suenter l'inscunter cun la populaziun a Liestal èn ils dus novelegids ids dal Rain giuadora en la citad da Basilea – nua che la saira festiva cuntinuescha cun ina tschavera da gala en la halla St. Jakob.
Surpassar cunfins en in senn positiv
Cusseglier federal Albert Rösti ha tegnì il pled festiv per il nov elegì president dal Cussegl naziunal. El ha ludà la carriera politica dad Eric Nussbaumer, che quel haja cumenzà cun bler lavur stentusa. E Rösti ha era menziunà ils temps, cura ch'el sa duellava adina puspè tar dumondas da la politica d'energia, tranter auter en l'emissiun da televisiun Arena.
Il motto dad Eric Nussbaumer per ses onn da presidi è – «Surpassar cunfins, schlargiar l'orizont». El ha punctuà l'impurtanza da collavurar sur ils cunfins.
-
Bild 1 von 5. Eva Herzog ed Eric Nussbaumer spetgan a Berna sin il tren spezial vers Liestal. Bildquelle: Keystone.
-
Bild 2 von 5. Era Eva Herzog ed Eric Nussbaumer han chantà durant il bainvegni a Liestal. Bildquelle: Keystone.
-
Bild 3 von 5. Da buna luna durant il retschaviment a Liestal. Bildquelle: Keystone.
-
Bild 4 von 5. Sin in bastiment han Eva Herzog ed Eric Nussbaumer fatg il viadi a Basilea. Bildquelle: Keystone.
-
Bild 5 von 5. Il cortegi cun las persunas envidadas il suentermezdi amez Basilea. Bildquelle: Keystone.
Cun schumbers, tschivlots e rap
La festa per Eva Herzog ed Eric Nussbaumer ha cuntinuà il suentermezdi cun ina festa sin il Marktplatz amez Basilea. Dasper la culissa acustica cun schumbers, tschivlots e rap – hai era dà liongia e biera.
Ella stoppia uss esser neutrala per in onn en ses nov uffizi, ha Eva Herzog manegià en ses pled. Ella veglia dentant schon anc dir insatge – che la Svizra pudessia vertir in zic «Verbaslerung». Ed ella ha numnà la rolla da piunier dal chantun, uschia en la politica d'ambient ed en la politica sociala.