Siglir tar il cuntegn

Svizra Prest 130’000 autos en Svizra èn pertutgads da las manipulaziuns

En Svizra èn 128’802 vehichels pertutgads da las manipulaziuns da svapur da VW. Quai ha communitgà la Amag, l'importadra generala da VW.

Prest 130’000 autos dal concern da VW ston vegnir remediads en Svizra.
Legenda: Prest 130’000 autos dal concern da VW ston vegnir remediads en Svizra. Keystone

I sa tractia da models da la marca VW, Audi, Seat, Skoda e vehichels utilitars da VW. Ils autos sajan gia en circulaziun. Amag vegnia ad orientar la clientella pertutgada. Ils vehichels stoppian vegnir remediads. Avant che la Confederaziun vegnia activa ha Amag gia tratg il frain d'urgenza: Per vehichels novs cun motor da diesel EU5 vala per immediat in stop da vendita.

Era Audi è pertutgà

Cler è entant era ch’autos dad Audi èn era pertutgads da las manipulaziuns. Sco quai che la societad affiliada da VW ha confermà oz, èn era 2,1 milliuns da lur vehichels pertutgads da las manipulaziuns da svapur. La gronda part da quels èn en circulaziun en l'Europa dal vest.

I sa tractia qua dals motors da turbodisel da 1,6 e 2,9 liters ch’èn vegnids duvrads per ils autos dal tip A1, A3, A4 ed A6, l’auto da sport TT ed ils vehichels champesters Q3 e Q5. I sa tractia qua dals autos ch’adempleschian la norma da svapur EU5. Sco tar VW na sajan ils autos cun la norma da svapur EU6 betg pertutgads.

Il motor ch’ha tar VW internamain il num «EA 189» è vegnì duvrà en differents models e marcas dal concern, uschia era tar Skoda.

Investigaziuns cunter anteriur schef

Entant ha la procura publica da Braunschweig communitgà d'investigar cunter l'anteriur schef da VW, Martin Winterkorn. Ad el vegn rinfatschà cugliunaria.

Winterkorn pretenda da betg avair gì enconuschientschas da las manipulaziuns. El surpiglia dentant la responsabladad. Dapi l'emna passada n'è Winterkorn betg pli a la testa da VW.