Siglir tar il cuntegn
Inhalt

Svizra Prest 2'000 dumondas han ils cussegliers federals respundì

En questa legislatura han ils cussegliers e las cusseglieras naziunalas inoltrà prest 2'000 dumondas, quai ha scrit il Cussegl federal en sia resposta sin ina moziun. Cun 69 dumondas è Carlo Sommaruga a la testa da la tabella. Dals Grischuns ha Martin Candinas inoltrà las bleras dumondas, en total 9

Purtret da Simonetta Sommaruga durant in'ura da dumondas.
Legenda: Durant questa legislatura ha il Cussegl federal stuì respunder a prest 2'000 dumondas. Keystone

Exact eran quai 1'965 dumondas. En media ha el stuì respunder a stgars 9 dumondas per cusseglier. Las differenzas èn dentant grondas. Las pli bleras dumondas ha inoltrà il cusseglier naziunal genevrin Carlo Sommaruga da la PS. El ha pretendì 69 giadas scleriment. Sin plazza dus è Barbara Steinemann cun 60.

Candinas cun 9 dumondas

Dals parlamentaris grischuns ha Martin Candindas dumandà il pli bler. Il cusseglier naziunal da la PCD ha inoltrà 9 dumondas ed è uschia sin plazza 66. Silva Semadeni (PS) otg (plazza 85), Heinz Brand (PPS) trais (plazza 138) e mintgamai duas dumondas han tschentà Duri Campell (PBD, 160) e Magdalena Martullo Blocher (PPS,166).

Quant temp ch'el impundia e quant ch'i custia per dar resposta n'ha il Cussegl federal betg pudì dir. Da sclerir quai fiss memia pretensius e betg en proporziun, scriva il Cussegl federal. El renviescha dentant sin las cifras dal 2007 per ils custs da sclerir ina moziun parlamentara. Quels èn tenor la stimaziun da lura tar 6'120 francs. Dentant possian ils custs variar ferm, tut tenor cumplexitad.

Maldiever da l'instrument

Fatg questa dumonda aveva il cusseglier naziunal da la PCD, Thomas Ammann (SG). I vegnia fatg maldiever da l'instrument cun quai che tscherts parlamentaris tschentian numerusas dumondas che possian vegnir respundidas bilateral u en in auter context, crititgescha el. Plinavant dettia er anc dumondas supplementaras populisticas u politicas. Quai piglia davent memia bler temp da cussegliar.

Sa chapescha che mintga parlamentari haja il dretg da far diever dals instruments parlamentars, ha accentuà Ammann. Sch'i vegnia fatg maldiever dettia dentant il privel che quest instrument vegnia manà ad absurdum.

L'ura da dumondas dal Cussegl federal

L'ura da dumondas ha mintgamai lieu il glindesdi da la segunda e terz'emna da la sessiun. Ils cussegliers naziunals ston inoltrar las dumondas avant a scrit. Savens vegnan tschentadas dumondas tar temas che vegnan discutads en la publicitad. Il cussegl federal respunda a bucca las cumondas durant l'ura. Las dumondas che n'han betg pudì vegnir respundidas durant l'ura, respunda il cussegl federal suenter a scrit.

RR novitads 12:00