Siglir tar il cuntegn

Header

Legenda: Travail Suisse e sindicats pretendan in auzament da pajas tranter auter per la branscha da sanadad. Keystone
cuntegn

Pretensiun da paja Persunal duai survegnir dapli paja

Pli autas pajas sajan impurtantas per surmuntar meglier la pandemia. Perquai pretenda Travail Suisse, la Federaziun da tetg da lavurantas e lavurants ensemen cun sindicats, in auzament da pajas per proxim onn. Tut tenor branscha èn las pretaisas differentas.

Persunas che lavuran duain pudair profitar dal svilup positiv da l’economia. Oravant tut en il commerzi en detagl ed en il sectur da sanadad pretendan las organisaziuns auzaments da paja dad almain 3 fin 4%. Las pajais en quels secturs na s‘hajan betg vegnidas augmentadas ils ultims onns.

Gist en il sectur da sanadad saja la mancanza da persunal acuta ed il squitsch sin collavuraturas e collavuraturs grond. La pandemia haja anc accentuà quai. Però era per il sectur da construcziun pretenda Travail Suisse in auzament da paja. La branscha n'haja betg patì da la pandemia, perquai duain lavurantas e lavurants era profitar. Auter tar la gastronomia, causa che la branscha ha patì ferm pervia da la pandemia, vegnan auzaments da paja ad esser rars.

Las organisaziuns intunan ch'i regna anc adina ina differenza da paja che na po betg vegnir argumentada tranter dunna ed um. Quai era sche la Lescha d’egualitad revedida pretendia ina analisa da pajais da firmas cun dapli da 100 collavuraturas e collavuraturs. Dad adattar las pajas da las dunnas sutpajadas saja necessari.

audio
Per tadlar – curt e cumpact
00:42 min, Actualitad dals 12.08.2021.
laschar ir. Durada: 00:42 minutas.

RTR actualitad 12:00

Artitgels legids il pli savens

Scrollar a sanestra Scrollar a dretga