L'aur è stà oz uschè char sco il davos avant sis onns. Ina unza fina dad aur - che paisa radund 31 grams, ha custà dapli che 1'500 dollars. Quai è uschè bler sco la davosa giada la primavaira 2013. Sco raschun principala, per l'augment dal pretsch da l'aur, vala il conflict commerzial tranter ils Stadis Unids e la China.
Dentant er ils tschains bass giogan probabel ina rolla. L'institut d'emissiun american Fed ha sbassà la fin da fanadur per l'emprima giada dapi 10 onns ils tschains directivs. Quels pudessan tenor la banca schizunt anc ina giada vegnir sbassads. Pervia ch'il aur na porta nagin tschains, vegn il metal prezius pli attractivs per investurs. Tenor experts vulan ils investurs era pli e pli savens uschenumnadas «valurs segiras» - tranter quellas tutga l'aur.
RR novitads 20:00