La guerra en l'Ucraina ha er ina gronda influenza sin ils pretschs d'energia en l'entir mund. Perquai examinescha il Cussegl federal da distgargiar las chasadas svizras. Quai ha ditg la ministra d’energia Simonetta Sommaruga envers la “Sonntagszeitung”. Il Cussegl federal tegnia en egl sco ils pretschs da stgaudar sa sviluppeschian. En connex cun ils custs per forza electrica vegnia el ad examinar tge mesiras ch’i dovria dad eventualmain distgargiar chasadas cun entradas bassas ed er intginas interpresas pitschnas u mesaunas. Da tge furmas d’agid concretas ch’il Cussegl federal discuteschia, n’ha Sommaruga fatg naginas indicaziuns.
En Germania per exempel ha la regenza decis in pachet da mesiras per l’energia sur 17 milliardas euros. Là duajan ils abitants survegnir ina contribuziun unica. En pli vul la regenza a Berlin sbassar las taglias sin benzin e diesel.
