La federaziun farmazeutica ha laschà far per la 18avla giada il monitoring.
Tranter la branscha farmazeutica ed il stadi datti adina puspè dispitas pervi da fixar ils pretschs da medicaments, per part s'occupan las dretgiras cun las dumondas dispitaivlas. Ils pretschs vegnan tranter auter fixads cun agid da cumparegliaziuns cun l'exteriur. Quai ha chaschunà ils onns passads ina reducziun dals pretschs. En general s'augmentan ils custs e tenor il maini da la populaziun cuntinueschia quest trend.
Per dapli transparenza
En general èn las persunas dumandadas dentant cuntentas cun il sistem da sanadad. 82% fan ina bilantscha positiva davart la lescha d'assicuranza da sanadad. Per 96% è la qualitad dal sectur da sanadad «plitost buna», «buna» u schizunt «fitg buna». Passa 80% giavischassen dentant dapli infurmaziuns davart la qualitad da las prestaziuns, e quai avant il tractament.
RR novitads 11:00