Siglir tar il cuntegn

Header

cuntegn

Pretschs fairs Il Cussegl naziunal vul franar ils auts pretschs svizzers

Il Cussegl naziunal vul far insatge cunter ils auts pretschs svizzers. L'iniziativa dal pretsch fair refusa el, vul dentant eliminar il supplement svizzer per consuments svizzers e fatschentas pitschnas u mesaunas grazia ad ina midada da lescha.

Il supplement nungiustifitgà per consuments svizzers ed interpresas sco er il maun public custa mintg'onn pliras milliardas francs, perquai saja l'iniziativa er uschè populara, ha ditg Beat Jans (PS/BS), il pledader da la cumissiun.

L'iniziativa pretenda ch'ils clients svizzers pon cumprar en directamain en l'exteriur per ils pretschs da l'exteriur. Il Cussegl naziunal refusa l'iniziativa, sustegna però la cuntraproposta indirecta che vul scriver ils giavischs da l'iniziativa bunamain senza midada en la lescha.

Nagin geoblocking pli

La chombra gronda vul ina lescha da cartel pli severa e vitiers scumandar l'uschenumnà «geoblocking». Cun lez impedeschan commerziants d'online che la clientella svizra po cumprar directamain en lur stores en l'exteriur.

En spezial na duai il dretg da cartel cumpigliar betg mo interpresas en posiziun da monopol mabain er interpresas cun ina posiziun relativamain pussanta dal martgà. Quai èn questas interpresas da las qualas autras èn quasi dependentas perquai ch'i na dat naginas alternativas.

Las prescripziuns na duain betg mo valair envers interpresas da l'exteriur mabain er tranter las interpresas en Svizra.

La fatschenta va uss en il Cussegl dals chantuns.

RTR novitads 21:00

Artitgels legì il pli savens

Nach links scrollen Nach rechts scrollen