Siglir tar il cuntegn

Header

cuntegn

Prevista Tge sa mida il 2022?

Tranter auter datti quest onn dapli dretgs per persunas assicuradas, trametter brevs vegn pli char e cumprar en online vegn pli favuraivel.

  • Questa midada pertutga tut quels e quellas che cumpran las chaussas gugent online. Shops da l'exteriur han enfin uss manà direct tar la pagina svizra. Quai muntava ch'ils products eran savens pli chars. Quai uschenumnà Geoblocking è da nov scumandà. Perquai han ins uss las medemas cundiziuns da cumpra sin la pagina svizra sco sin quellas da l'exteriur. Ils online-shops n'èn dentant betg obligads da furnir en Svizra.
  • Tge che vegn dentant pli char, èn las brevs ed ils pacs tar la Posta. Ina brev da posta A custa uss nov 1,10 francs, ina brev posta B 90 raps. Quai augment argumentescha la Posta cun quai ch’i vegn scrit adina pli paucas brevs.
  • Plinavant datti midadas tar l’Assicuranza d'invaliditad. Enfin ussa han persunas cun impediments corporals u psichics retschavì ina renta dad AI tenor in sistem da stgalims. Pia ina quarta, ina mesa, ina da trais quarts u in'entira renta d’invaliditad. Quai sistem da stgalims na datti davent da quest onn betg pli. Uschia èsi per exempel era pussaivel da survegnir ina renta da 65%. Plinavant duain persunas giuvnas cun impediments vegnir integradas meglier en la vita professiunala. Ellas duain vegnir sustegnidas pli ditg ed avair meglier access tar cussegliaziuns e coachings. La glista da las malsognas da naschientscha è vegnida adattada al nov stan da la scienza. Uschia pon era malsognas pli raras vegnir resguardadas. La AI po era surpigliar ils custs per il tractament da quellas malsognas – era sche quel n'è anc betg sa cumprovà dal tut.
Dunna che mussa l'attest dad AI
Legenda: Keystone
  • Quella midada na pertutga betg la maioritad dals Svizzers e da las Svizras, dentant per trans-persunas po quai pass avair ina gronda muntada. Numnadamain laschar midar il prenum ed il gener tar l’uffizi civil. Davent da l'onn 2022 va quai cun pli pauc birocrazia e la midada custa 75 francs. Decider pon ins tranter il gener feminin u masculin. L’opziun divers na datti enfin ussa betg en Svizra, era sche quai vegn adina puspè discussiunà en la politica. Quella midada tar l’uffizi civil è pussaivla per persunas sur 16 onns. Sche la persuna è pli giuvna, sto in represchentant legal dar la lubientscha per quella midada.
  • Da nov stuain nus guardar dapli reclamas sin televisiun. Sch’ins ha la pussaivladad da guardar il program da televisiun dals davos 7 dis – l'uschenumnada funcziun da Replay – han ins enfin ussa pudì sursiglir tut las reclamas ch’ins na vuleva betg guardar. Quest onn vegni a dar reclamas ch'ins na vegn betg da sursiglir. Pretendì quella midada han ils emetturs ch’èn finanziads da reclamas. Plirs purschiders vulan vinavant porscher da pudair guardar televisiun senza reclamas – per quai stuess la consumenta u il consument alura dentant pajar dapli. Dapli detagls sco tut quai duess vegnir realisà duess vegnir communitgà l'entschatta da l'onn.
apparat da telecumond alv
Legenda: Keystone
  • Davent da proxima primavaira sto l'e-bike avair tschentà en la chazzola era durant il di – sumegliant sco tar ils autos. Uschia vuless il Cussegl federal evitar accidents e tgi che na sa tegna betg vid quai, sto quintar cun in chasti.
  • A partir dal favrer duai dar in bigliet ch’ins po midar davent da la secunda en l’emprima classa e quai pli favuraivel. Il principi è il medem sco tar ils normals bigliets da spargn. Sch’ils chars da l’emprima classa èn mez vids è la schanza pli gronda ch’ins na sto betg pajar bler dapli per pudair midar classa.
Automat da bigliets
Legenda: Keystone
  • Perquai che la lescha davart ils contracts d’assicuranzas è vegnida revedida, han tut las persunas assicuradas dapli dretgs envers las segiradas. Da nov pon ins sa retrair d'in contract enfin 14 dis suenter sia cunvegna. Plinavant ston las segiradas pajar ils donns che vegnan annunziads entaifer 5 e betg sco enfin uss entaifer 2 onns. E sche l'uffant da la vischina rumpa durant dar ballape ina fanestra, pon ins da nov gist annunziar sez quai a la segirada da responsabladad da la vischina. Enfin ussa stueva lezza far quai sezza.

RTR actualitad 11:00

Artitgels legids il pli savens

Scrollar a sanestra Scrollar a dretga