Il prim d'avrigl hai dà inqual novitad dubiusa – e quai tant da medias sco era da firmas en Svizra.
Ina selecziun:
Pervia da la pauca naiv haja il Grischun 300'000 tonnas sal da sterner memia bler che scroda prest – sco la Südostschweiz rapporta datti perquai ina cooperaziun tranter l'Uffizi da construcziun bassa e producents da charn setga. Il sal tanscha per radund trais milliardas pulpas.
Il chantun Berna veglia promover igl ir cun velo cun avantatgs da taglia, rapporta Radio Berner Oberland. Tgi che giaja a lavurar cun il velo possia en il futur trair giu per mintga kilometer in franc da l'entrada suttamessa a la taglia.
En il chantun Fribourg e Vad è la revoluziun ecologica arrivada tar la Baselgia. En il futur duess er il spazi intern da las baselgias vegnir semnadas, sco «la Liberté» scriva. L'uvestgieu da Lausanna, Genevra a Fribourg cusseglia da transfurmar il confessiunal en locals da permacultura.
E tgi che visita Basilea possia danovamain prender a tschains indigens per 25 francs per ura. Basilea Turissem annunzia ses nov program «Rent a Buddy», uschia in cumpogn possia per exempel gidar tar la fotografia da regurdientscha – sin giavisch saja er pussaivel da prender a tschains ina famiglia u in chaun.
Tut quellas novitads n'èn dantànt betg propi da prender seriusas.