Ina festa è in lieu da inscunters e nua ch’ins po parter la fortuna. E sut quest motto envidan Corina Schmed (RTR), Sven Epiney (SRF), Sandy Altermatt (RSI) e Jean-Marc Richard (RTS) da festivar ensemen il prim d'avust.
Ma festivar n'è betg l’unica moda dad esser fortunà. Ils quatter moderaturs e moderaturas passentan mintgamai en lur regiuns linguistas aventuras ed istorgias tut spezialas en connex cun la fortuna. Els inscuntran persunas che raquintan e mussan tge che accumplescha els e fa ventiraivel. In viadi tras la Svizra plain surpraisas, curiusitads, emoziuns che collian e differenzas che fan unica la Svizra.
Stgazis, il gust da la natira e cunfins mentals e corporals
Per RTR ha Corina Schmed visità la cuschiniera da natira Rebecca Clopath ch'ha decis da returnar enavos tar sias ragischs enstagl da far carriera en las cuschinas da gourmet dal mund.
Sin il Munt Buffalora ha ella fatg il viadi en las profunditads da las minieras istoricas en tschertga da stgazis.
En il Lag da Cresta ha ella mess a sasezza la pli gronda sfida insumma ed è sfunsada en il mund tut spezial dal sport dad apnoe.
L'entira emissiun naziunala dal prim d'avust da la SRG SSR è da vesair la saira dal prim d'avust a las 20:10 sin SRF1.