In tren da festa da la SBB Cargo è stà il prim tren ch'è cursà tenor urari atras il tunnel dal Gottard. Punctual da las 8 e 17 è l'emprim tren da persunas arrivà a Lugano. Sin la staziun renovada da Lugano hai dà in grond bainvegni. Curt suenter il tren da persunas è er l'emprim tren da vitgira arrivà en la pli gronda citad dal Tessin.
Davent dad oz è il nov urari en vigur. Cun prender en funcziun il nov tunnel dal Gottard datti sin quest traject er la pli gronda midada da l'urari da quest onn.
Ina capodovra
Il tunnel è vegnì construì en 17 onns. Cun 57 kilometers sa tracti dal pli lung tunnel da viafier dal mund.
Sia construcziun fuva ina capodovra da la precisiun. Tar la perfuraziun ils 15 d’october 2010 muntava la divergenza verticala in centimeter, l’orizontala otg centimeters. Era autras cifras fan impressiun: Fin 2’400 lavurantas e lavurants han lavurà davent dal 1999 tar temperaturas fin 50 grads en il tunnel. Nov persunas han pers lur vita. Il Gottard è actualmain il tunnel il pli profund dal mund.
Inauguraziun da la nova staziun a Lugano
A Lugano è vegnì inaugurà la staziun da viafier ch'è vegnida renovada cumplettamain. Il cumplex ha uss er ina colliaziun directa cun la funiculara ch'è medemamain vegnida modernisada. En tut ha la renovaziun custà 18,6 milliuns francs. L'inauguraziun è stada en connex cun la midada da l'urari.
Dapli davart il Gottard - il pli lung tunnel da viafier dal mund en il dossier da RTR.
RR novitads 06:00