Privel da bova da crappa - Blatten en il Vallais è evacuà

• Sur Blatten en il Lötschental sa mova la muntogna, ina gronda bova da crappa smanatscha.
• Las autoritads han evacuà l'entir vitg cun radund 300 abitantas ed abitants. Be las parts Weissenried ed Eisten betg.
• Las autoritads quintan che la bova pudess vegnir las proximas uras u il pli tard damaun.
• En il mender cas pudess la grippa satrar l'entir vitg.

La situaziun a Blatten en il Lötschental (Vallais) è sa pegiurada. Suenter ina bova da glitta sur il vitg en la regiun Kleines Nesthorn e Birchgletscher han las autoritads evacuà il vitg. Al culm datti adina puspè crudadas da crappa pitschnas ch'ins auda bain. Era pon ins vesair gia da lunsch la puorla da quellas crudadas.

«La situaziun è fitg acuta», di Matthias Ebener, schef d'infurmaziun dal stab directiv, ad SRF. «Igl è cler a tuts che la bova vegn proximamain.» La evacuaziun saja finida, tuttas persunas èn or da la zona da privel. Tut las persunas evacuadas hajan ins pudì metter sut tetg privat u en abitaziuns vidas. Quai ha communitgà la vischnanca da Blatten il glindesdi saira. Alloschis per gruppas n'hajan ins betg stuì utilisar.

La bova pudess vegnir en las proximas uras

Sco il schef d'infurmaziun di, hajan ils geologs giuditgà la situaziun questa damaun. «Els èn vegnids a la conclusiun ch'il material dovra probablamain dapli plaz che pensà l'emprim.» Ils experts quinten che la grippa pudess crudar en las proximas uras u il pli tard damaun mardi. I vegnan ad esser vers dus milliuns meters cubics che ruschnan. «En il mender cas vegn quai ad esser tschintg milliuns meters cubics», declera Alban Brigger da la partiziun privels da natira dal chantun Vallais. El quinta che la grippa croda sin il glatscher e tut vegn ensemen a val.

Igl ha cumenzà l'emna passada

Ils geologs dal chantun han installà ils ultims dis cameras ed in apparat da GPS. Cun quai han els constatà ina stuschada da passa 2,9 meters, e quella saja uss probablamain anc pli gronda, di Alban Brigger da la partiziun privels da natira dal chantun Vallais: «Nus vesain ch'ina bova da crappa s'annunzia.»

Avant intgins dis era grippa dal Kleiner Nesthorn crudada sin il Birchgletscher ed han chaschunà ina bova. Il Birchgletscher vegn observà dapi ils onns 1990. La vischnanca suppona che la naiv che lieua sur bun 2'500 meters sur mar pudess avair chaschunà la situaziun actuala.