Siglir tar il cuntegn
cuntegn

Svizra Privel da lavinas anc considerabel

L'Institut federal per la perscrutaziun da naiv e lavinas annunzia per la gronda part dal chantun in privel da lavinas considerabel, stgalim 3.

Legenda: Guardar il video Regurdientschas al 1999, l'enviern da lavinas. Durada 02:44 minutas.
Or da Telesguard dals 15.01.2019.

Il privel da lavinas en las Alps Svizras tschessa in zic. Actualmain vala per la pli gronda part da las Alps in privel da lavinas considerabel, stgalim trais. Sur 1'800 meters è la situaziun dentant vinavant critica. Uschè blera naiv sco uss hai uschiglio strusch dà ina giada en questa perioda.

Perquai avertescha l'Institut federal per la perscrutaziun da naiv e lavinas che far sport d'enviern ordaifer las pistas segiradas saja actualmain fitg ristgà. La naiv nova e cuflads sajan fitg privlus. Lavinas possian era rumper giu da la naiv veglia. I possia era dar lavinas spontanas.

Tavau avertescha

Per Tavau valan vinavant restricziuns entaifer la vischnanca. Uschia appellescha ella dad evitar spundas nua pussaivel.

Naginas navadas da record

Malgrà ils maletgs impressiunants da grondas navadas ed il privel da lavinas grond, per muments schizunt fitg grond, na tutgan las navadas dals ultims trais dis betg tar ils diesch eveniments dals trais dis ils pli intensivs, communitgescha l'Uffizi federal per meteorologia e climatologia MeteoSvizra.

Da la sonda saira fin il mardi la damaun hai dà en las Alps dal Nord, dal Wildhorn fin en il Liechtenstein, en il Goms, il Grischun dal Nord ed en l'Engiadina sin in'autezza da 1'500 meters sur mar 80 fin 120 cm naiv. En las Prealps centralas ed orientalas, en il Grischun Central e per part en il sid dal Vallais hai dà 50 fin 80 cm. En las autras parts hai dà pli pauc che 50 cm naiv.

RR novitads 12:00+