Siglir tar il cuntegn

Header

cuntegn

Svizra Privel da terrorissem resta augmentà

Il privel da terrorissem en Svizra resta augmentà. A quella conclusiun vegn il schef dal servetsch d’infurmaziun federal, Jean-Philippe Gaudin. Suenter esser 100 dis en uffizi ha el fatg bilantscha davart la lescha davart il servetsch da spiunadi, ch'i dat dapi in onn.

Il dumber d'attatgas en l'Europa è bain sa sminuì dapi la stad da l'onn 2017. Il privel da terrur na vegnia però betg be mesirà cun resguardar las attatgas ch'i ha dà. Per valitar la situaziun stoppia er cas da radicalisaziun e sa cumportar suspectus vegnir considerads, argumentescha Gaudin. Il schef dal servetsch, Jean-Philippe Gaudin, sa legra che la collavuraziun cun ils partenadis chantunals, naziunals ed internaziunals funcziunia bain, hai num vinavant en la communicaziun dal servetsch.

Attatgas da cyber èn il pli grond privel

La pli gronda sfida per la Svizra vesa Gaudin en attatgas da cyber. Ils ultims onns haja la spiunascha cun meds d'infurmaziun e communicaziun prendì tiers fitg. Perquai dettia uss ina gruppa da lavur che duai evitar che las elecziuns dal parlament federal pudessan vegnir manipuladas. Cun las novas sfidas e cun la nova lescha dal servetsch d'infurmaziun dettia quai dapli lavur. Uschia creschia plitost la lavur giuridica ed administrativa. Latiers pretenda Gaudin dapli meds.

RR novitads 12:00

Artitgels legids il pli savens