Tar la Gomina sa tracta dad in'interpresa da mecanica da precisiun cun 30 collavuraturs. L'engaschament da la firma haja caracter da model ed haja potenzial per inspirar, uschia il commember da la giuria Bernhard Russi. Las stentas da la firma èn ussa vegnidas honoradas cun il «Prix Montagne».
L'interpresa Gomina
Gomina era oriundamain ina fatschenta che furniva plats da resgias. Oz producescha l'interpresa plats da resgiar da precisiun per la chirurgia d'ossa. Ella producescha tut en l'atgna chasa e venda ses products en 13 pajais. 90% dals collavuraturs en l'interpresa sajan dal Goms nua che l'interpresa sa chatta.
Il Prix Montagne
Il Prix Montagne vegn surdà dapi il 2011 mintg'onn da l'Agid per la muntogna e da la gruppa svizra per las regiuns da muntogna. Tranter ils finalists eran era dus projects grischuns: Hotel Piz Linard a Lavin e Warmes Bett a Ilanz/Glion.
RR novitads 12:00