Iniziativa da fair-food
| PRO | CONTRA |
|---|---|
| L'iniziativa vul promover meglier l'agricultura persistenta ed augmentar la qualitad da las victualias importadas. | La Svizra fa gia bler per victualias segiras e producidas en moda persistenta e posseda gia oz ils instruments per far quai. |
| Il commerzi global cun victualias na dastga betg avair lieu sin donn e cust dal bain dals animals, da l'ambient u da l'agricultura purila. | La Constituziun e la Lescha d'agricultura pretendan gia oz ch'il svilup da l'agricultura saja socialmain cumpatibel ed ecologic. |
| L'iniziativa promova la commerzialisaziun da victualias producidas sin plaun regiunal. Las victualias na daventan dentant betg pli charas, mabain pli frestgas. | Las controllas en ils pajais da producziun èn difficilas ed augmentan ils custs dals products importads en Svizra. |
| L'iniziativa sa basa sin instruments cumprovads e na chaschuna betg dapli, mabain meglras reglas. Ella po vegnir realisada senza periclitar cunvegnas internaziunalas. | L'iniziativa pretenda ch'ils standards svizzers valian da principi era per victualias importadas. Talas barrieras commerzialas pericliteschan las cunvegnas existentas. |
En il Parlament federal ha l'iniziativa «Per victualias saunas sco era producidas a moda ecologica e faira (Iniziativa da fair-food)» betg chattà grond succurs. Tant il Cussegl naziunal (37 gea / 139 na) sco era il Cussegl dals chantuns (1 gea / 34 na) cusseglian cleramain da dir na al project da la partida verda.
Grondas simpatias en la populaziun
Tenor l'emprim barometer da votaziun da la SRG SSR èn las simpatias per l'iniziativa dals Verds dentant repartidas autras. Sche las Svizras ed ils Svizzers avessan gì da decider l'entschatta avust avessan 78 pertschient da las persunas che fissan idas a l'urna ditg gea u plitost gea a l'iniziativa da fair-food.
L'ultim pled ha però il suveran – il cumbat da votaziun ha cumenzà ed ils 23 da settember sa mussa, tge vart che ha pudì persvader las Svizras ed ils Svizzers.
RR votaziuns dals 23-09-2018