Siglir tar il cuntegn

Header

giuvens e giuvnas stattan davos las stgatlas cun las suttascripziuns
Legenda: Ils Giuvens socialists avant che surdar l'iniziativa a la chanzlia federala. Keystone
cuntegn

Svizra Pro e contra «nagina speculaziun cun nutriment»

L'ONU numna qiai la pli gronda crisa schliabla da noss temps. Bunamain 800 milliuns umans pateschan da la fom sin noss mund. Quai è mintga 9avla persuna. Cun lur iniziativa «Nagina speculaziun cun nutriment» vulan ils Giuvens socialists far insatge cunter quella situaziun insupportabla.

La speculaziun cun nutriment saja ina da las raschuns pertge che milliuns da carstgauns pateschian da la fom, di la vicepresidenta dals Giuvens socialists, Hanna Bay. «Quai è ina situaziun nunsupportabla e nus stuain ussa exnum far insatge e scumandar la speculaziun cun nutriment.»

La speculaziun chaschuna fomaz.
Autur: Hanna Bayvicepresidenta Juso CH

Gist quai vulan ils Giuvens socialists cuntanscher cun lur iniziativa cul titel «Nagina speculaziun cun nutriment». Tar in gea ils 28 da favrer na duain interpresas en Svizra betg pli pudair specular cun uschenumnads derivats agrars.

Purs, negoziants e producents dovran quels instruments per reducir lur ristg finanzial. En in contract fixeschan els per con ch'els vegnan a vender lur racolta. Uschia san omaduas varts planisar, independent da las fluctuaziuns dal pretsch sin la fiera mundiala. Il risico porta il speculant che fa gudogn sch'il pretsch sin la fiera mundiala è tar la racolta pli auts che fixà el contract, ni che sperda sche quel è pli bass.

«Uschè lunsch saja quai era en urden», di la Cussegliera dals chantuns socialdemocratica Pascale Bruderer. Il problem entschaivi là, nua che tals derivats vegnan duvrads per specular a la bursa. «Tgi ch’enconuscha ils mecanissems dals martgads sa ch’i dat in’influenza sin ils pretschs a curta vista. Là vegn fatg la fatschenta, quai è attractiv per il speculant. Mo quai sto ins impedir perquai che quella speculaziun fa donn», di Bruderer.

Arguments ch'il pur e Cusseglier naziunal burgais-democrat Duri Campell lai buc valair. La pli gronda part dals studis davart la speculaziun cun tals derivats agrars vegnian a la conclusiun, che quellas fatschentas hajan in effect calmond sin ils pretschs. «La raschun eran situaziuns catastrofalas pervia da setgira ni inundaziuns. Là èn ils pretschs ids a munt.»

L'iniziativa è in privel per l'Africa.
Autur: Isabelle ChevalleyCussegliera naziunala PVL

Che betg la speculaziun saja la culpa dal fomaz en las terras dal terz mund conferma era la Cussegliera naziunala verd-liberala e presidenta da la gruppa parlamentara Svizra - Africa, Isabelle Chevalley.

«Oz èn las raschuns per il fomaz en l'Africa las guerras ed ils problems climatics. Actualmain ves'ins quai cun «El Niño» che procura per ina fitg gronda setgira en l'Africa. In auter grond problem è era la conservaziun da nutriment. Ils Giuvens socialists schlian cun lur iniziativa pia insumma nagins problems. Anzi, in gea a l'iniziativa po perfin esser cuntraproductiv perquai che intgins pajais, sco per exempel l'Etiopia han installà bursas per talas fatschentas a termin per gidar a 2,4 milliuns purs. Per l'Africa è l'iniziativa pia in veritabel privel.»

In gea a l'iniziativa dals Giuvens socialists na fissi betg mo schlet per ils paupers en il terz mund, mabain era ina frida per la plazza economica svizra, agiunta Campell. «Tenor il Cussegl federal pudessan da quai da 600 fatschentas bandunar la Svizra tar in gea a l’iniziativa dals Giuvens socialists. 10’000 plazzas da lavur pudessan ir a perder. L’iniziativa na gida nagut sche la speculaziun cuntinuà en l’exteriur.»

«Uschè lunsch na vegni betg a vegnir» è Pascale Bruderer persvasa. «Nus vulain ina ferma plazza da finanzas en Svizra ch' è fundada sin in’autra basa che sin la speculaziun cun nutriment.»

Pertutgadas dal scumond sajan mo quellas partiziuns da las bancas che s’occupian unicamain da la speculaziun cun derivats agrars.

Artitgels legids il pli savens

Scrollar a sanestra Scrollar a dretga