La dunna che ha attatgà il mardi suentermezdi duas dunnas en in center da cumpra a Lugano e blessà grevamain ina dad ellas cun in cuntè, era dapi pli ditg enconuschenta a las autoritads. Quai ha communitgà l’Uffizi federal da polizia fedpol il mardi saira. I vegnia uss sclerì, schebain la dunna haja contacts tar l'organisaziun terroristica Stadi Islamic. La polizia ha arrestà la dunna il mardi anc al lieu.
Il president da la regenza tessinaisa Norman Gobbi ha ditg, ch’ins supponia che la dunna svizra da 28 onns saja vegnida radicalisada.
La dunna vuleva viagiar il 2017 en la Siria, communitgescha l'uffizi vinavant. La dunna era s’inamurada da lez temp en in dschihadist. Al cunfin tranter la Siria a la Tirchia è ella dentant vegnida arrestada da las autoritads tircas e tramessa enavos en Svizra. Silsuenter è ella vegnida ospitalisada pervia da problems psichics.