Problem da software ha chaschunà interrupziuns d'internet

In di suenter ina gronda panna cun la colliaziun d’internet ha la Swisscom chattà il motiv. Tenor il schef da Swisscom Urs Schaeppi saja in problem da software stà la raschun per la panna. Uschia ha Schaeppi cuntraditg a speculaziuns davart in'attatga da hackers.

A partir dal mardi da mezdi avevan clients da Swisscom en l’entira Svizra da cumbatter cun massivas interrupziuns da l’internet. Cunzunt clients da fatschenta eran pertutgads. En intginas citads na funcziunavan bancomats betg. La rait fixa e mobila n’eran però betg pertutgadas.

Nagin'attatga da hackers

Uss ha l’interpresa da telecommunicaziun eruì la raschun per las interrupziuns da l’internet dal mardi suentermezdi. Il schef dal concern Urs Scheappi è s'explitgà ad in'occurrenza publica a Berna e s'exculpà per l'incap. Il disturbi ha chaschunà il mardi per uras problems cun l'internet dal spectrum lartg.

Tge ch’è uss er cler: I n’è betg sa tractà d’in’attatga da hackers, sco quai ch’i era vegnì speculà. A medem temp ha la Swisscom communitgà che l’origin da l’incap sa chattava en in toc da la rait a Losanna.

Bancomat da la Banca Chantunala Grischuna funcziuna

0:29 min, dals 24.5.2016

Bancomats ord funcziun

A Losanna na funcziunavan bancomats per part betg pli sur mezdi, aveva rapportà la SDA. Er pliras redacziuns regiunalas da lezza eran stadas pertutgadas. Plinavant aveva il «Blick» rapportà che bancomats a Turitg na funcziunian betg.

Intgins bancomats parevan però da funcziunar. Vid in bancomat da la Banca Chantunala Grischuna a Cuira han ins pudì prender giu daners, sco il test da las 15:20 ha demussà.

RR novitads 15:00++ / 25.05.2016, 14:00